Mŏm gryfno idyjŏ na wpis ô Indyjach, ale jak żech pisoł wprowadzynie do niego to wyszło to duksze, jak to co chcioł napisać i z tyloma dygresjami, że ciynżko to by było spokopić.
Bestuż zaczna ôd pytaniõ: Znŏsz to? U nŏs i dalyj na zachōd, kŏżdy patrzy siebie, idziesz po ulice i żŏdyn ôd cia nic niy chce. Na weschodzie zaś mŏm wrażynie, co ajnfachowy szpacyr je choby przgigoda ze kategorii tych społecznych. Niy leziesz po ulice a po necu starannie utkanyj tkance społeczny miyszkańcōw. Tyś wlŏz do nich, najduchu. Leziesz i ône lezōm z tobōm, ja gynau ze tobōm, ty leziesz I ône tyż. 'A ftoś ty je? ' spyto keryś abo 'skōnd żeś je?', dopytŏ drugi. Kŏżdy chce podziwać, kŏżdy twōj ruch bydzie zarejestrowany i przekŏzany dalyj we tym necu. Włazisz do wsie, a ôni tam już dŏwno znali coś szoł, bo im wcześniyj ftoś po drodze pedzioł, abo zadzwonioł.
No i naszŏ piyrwszŏ rajza do Indyi, pokŏzała nŏm, co 'w rzici boł i gōwno widzioł' - niy byli my na to narychtowani. Ciynżko ôpisać, te uczucie, kiej wyłazisz na ulica a tam setki głōw ôrŏz sie na cia patrzōm. Gynau choby jaki bergmon na grubie trefioł na zoto i na nie sie dziwoł choby w zdrzadle i niy umioł spokopić co sam sie stało. Ale to niy ma nojgorsze, nojgorsze byli fotki, co je nŏm robili ofyn i mało kiery sie pytoł o zgoda. Jakbych boł sŏm, to by mje to tak niy wadziło, ale chwilami miołch richtig bojōnczki ô moja frela, kero jak to srogo blōndina postrzōd 'murckōw' wyglondała choby jakŏ morskŏ latarnia po ćmoku. A moc sie słyszy ô rōznych poruchach ze turystami, czy w ogóle gwołtem do kobiet.
U nŏs je cołkiym inakszyj. Bezto nŏs to fest mynczyło, strach mynczy. I tyn maras...ale ô niym bydzie niżyj.
W tych barzij turystycznych miejscach, już dziwajōm sie na biołych choby na łażonce portmany, ino 'dej, dej' abo 'kup, kup' i to nierŏz w taki ôklany sposób, ażech niyrŏz niy strzimoł i wydar sie na chopa...
I zarŏzki do nŏs doszło, co jeśli chcesz coby cie niy napasztowali, musisz sie kludzić po tyj ich tkance społecznyj jak ftoś ze lepszyj kasty co ôni.
I to nŏs tyż mynczyło, bo czamu mŏsz być niy-gryfny do ludzi, kerych niy znŏsz - ino ftoś ôszkliwy mioł by szpas z takiygo traktowanio czowieka.
Jak jużeś je 'lepszy' ôd nich, to ôrŏz widzisz tyn maras. Żŏdyn po sobie niy przontŏ, niy skludzŏ hasiōw a inkszych abfalōw. Ciepōm papiōrki kaj stojom pod siebie. Nŏjgorzyj to wyglōndŏ kole Taj Mahal, kaj jedyn z cudōw świata je genau obsztamowany bez hołdy hasiōw i hałp ze gōwna. Stoisz na tarasie Taj Mahal a na dole pół wsi srŏ do rzeki...
To wszystko nŏs tak szterowało, co mało nŏm niy spaściło byzuchu Taj Mahal, kery richtig je cudym świata i kiej już bydziesz na subkontynencie, to musisz go ôbejrzeć.
